بخدمتك عمي شنهي تريد بس كول
اجيب اللي تريده صلاله بالايد
واذا متريد كلشي صار هم كول
بخدمتك هم اجيب الكلشي متريد
مسح تحديد للكل انه سويت
واسمك هم بقه اتعداه التحديد
عده صوتك نشاز بأذني أي صوت
وحتى الصرخه منك جنهه تغريد
نعم غيرك اكو حلوين وهواي
لچن بس انت اصلي وهمه تقليد
ما اشتهي بيوم احجي وي غيرك
ولا تشتهي عيوني لغيرك تشوف
تدري شكد لهفتي عليك يفلان
بكد ظيم العراق عليك ملهوف
تسحك عالكلب صدكني ماضوج
بس انه عله مودك عايش بخوف
لان كلبي درب وجروحه عثرات
واخاف تطيح من تسحك بلا شوف
شكلك انه احبك والله غلطان
لان حتى الاحبك ناقصه حروف
وصل حبي الك حد ماهو معقول
بحيث وياي انت وانه مشتاك
تشابكني وتشاقيني واشاقيك
واصيح الله واكبر بسك فراك
ملك امشي عله طولي وانت وياي
ومن تبعد ادنك واخذ الراك
وبس انت عليك تشخص الناس
من كد ما حلو من بعيد تنضاك
وصاير بوگ بالحب هاي الايام
لذلك ما اعوفك خاف تنباگ
واذا لا سامح الله بيوم باگوك
وداعاً يا ضحك مرحبا يبجاي
گبل لا اشوفك انه تولعت بيك
وگبل لا نلتقي سميتك هواي
ما افك باب بيتي شما يدگون
وافكلك باب بيتي وانت ما جاي
واجيت وعركه صارت بين العيون
عليك عيوني هاي تصد گبل هاي
اذا غثيتني يصير الصبح ليل
واذا تضحكلي يشرك ليل دنياي
من تروح اصوم ويبدي رمضان
ومن ترجع ائذن واشرب الماي
