بسم الله الرحمن الرحيم
اشعار لاناس خلدوا بأسم الحسين الحلفي والمظفر والتميمي في أربعينية الامام الثائر
في أربعينية الحسين بن علي شط العرب ، يتقدم الشعرُ الشعبي العراقي الصفوفَ المفجوعة والملايين الباكية، فيمشي على قدميه باكياً نحو قبة الحسين شط العرب ، ويعلن حداده وسواده على فجيعة الطف..
فهذا الشاعر "سعدون التميمي" يرسم لوحة رائعة لملحمة الوجد الحسيني، ويصور كلَّ قلبٍ كربلاء وكلَّ دمعٍ للحسين، فيقول:
تطلبني عمر أكتب شعر وارثيك
وتطلبني دمع گد عمري حتى ابچيك
يا دمعة رفض شگت جفون الليل
يا منبر يلمّك حتى اريد انعيك
ردت ابچيك..
لگيتك باب جنه وروحي طفلة خوف
تلوذ بمستحاها لو يمر طاريك
نسد يا دين تطلبنه بسِتر كل العراقيات
امنين نجيب ذمّه التگدر توفّيك؟!
يا نحر التحدي الرجَّف الطغيان
يحسين الرسول الچان يفخر بيك
رغم وحش الطريق وقلة الأنصار
واچفوف الحقد ما گدرت تلاويك
أخجل من أذكرك يا أبو الأحرار
يا درب التحدي آلاف سارت بيك
حسين زرت حسين وكل گلب ميمون
وتتعنه الزلم وتريد بس ترضيك
أكثر من ألف عام انته بينه تعيش
صوت بنص ضمير الأمة ظل يفتر
نشوفك بالصواني بخبزة العباس
بدموع الثكالة ولوعة الخدّر
وتمرّ الفاجعة وتتجدد بكل حين
واسمك بالدمه بكل ثورة يتسطر
ومن نتذكر اسمك يصهل الميمون
وبس يقرأ القاري ينزف المنبر
ونشوف المشرعه والخيم والأنصار
وابو فاضل يرد اردود يتگنطر
يالمعلم الزلم تتجاسر اعله الموت
ويالمخلّي الجروح تگطّع الخنجر
ويالمعلم الرگاب تعاند السياف
ويالمعلم الجثث بالشدّة تتوذر
ويالمأسِس اسلام بعكس الاستسلام
ويالمعلم العبيد شلون تتحرر
اكتبت أول رسالة بفقه الاستشهاد
نحرك قلم صار وكربله الدفتر
رادك ألله تصبح كعبه للأحرار
وبدمك كتاب الله يتفسر
وچنت اتريد قلّه وخيرة الأنصار
وابد ميصير طف لنصار لو تكثر
صلاة الخوف ما خايف چنت هيهات
چنت خايف صلاتك خاف تتأخر
اشمرت دمّ الرضيع وما نزل للگاع
نزل فوگ السبايه يظلل امن الحر
واسمك لو يمر ينخطف لون اعداك
وحتى السيف منك وجهه صار اصفر
دمك قنبله وصاعقها عاشوراء
وبيوم الطبگ بالدمعه تتفجر
حتى الماله دين وما يعرف الله
أخذ منك رمز للثورة والمصدر
نحبك يا حسين بكثر ميبغضوك
يا مفتاح جنه واُمك الكوثر
نتعناك رغم القتل والتفجير
ونحس زفة عرس لو ردنه نتفجر
تزنجر كل سيوف الحقد يا مولاي
وسيفك ضاگ دمّ وأبد ما زنجَر
أبد ما زنجَر..
قصيدة (أبي الضيم) رائعة أخرى في حب الحسين شط العرب .. إذ يكاد ينطق كل بيت فيها بما في قلب الشاعر من حزن وأسى، ويترجم كل بيت ومقطع شعري فيها مشاعر الناس، مسلمين وغير مسلمين، إزاء قضية الشهادة.
صار سنين شامخ يا أبيّ الضيم
مناره من الأرض للسمه مرفوعه
إنته معدنك صافي وذهب تيزاب
وهاي الناس كلمن معدنه ونوعه
المحب لمن يحبك يا أبو السجاد
على الخدين سكته يجرن دموعه
يتجدد حزنّه من يمر عاشور
والك بگلوبنه تتجدَد اللوعه
إنته العلمتنه بمنهجك يحسين
ومشينه عالدرب وبروس مرفوعه
ومر بينه وكت كلش صعب مولاي
حتى الدمعه بمحبتك ممنوعه
محبتنه إلك لا عن طمع لا خوف
بس ربك فرضها بعرشه مطبوعه
وحگ نحر الرضيع ودم علي الاكبر
وحك چفين ابو فاضل المگطوعه
لوَن حبك يدخّلني جحيم النار
احس ذنوب عمري كلها مشفوعه
وقصيدة (يالتزور حسين) للشاعر نائل المظفر، وهي قصيدة كل بيت فيها يعادل قصيدة، وكل مفردة فيها تعادل بيت شعر.
يالتزور حسين إصبر لا تزور
إقره ليش حسين قامت ثورته
حتى من تنزل دمعتك عالحسين
تعرف شگد الثواب بدمعته
تدري ليش الميت ايعصره القبر؟
وتدري شيصيح القبر في ميّته؟
خاف حابس دمعه في حق الحسين
اليوم تطلع من ظفر سبابته
وحتى تعرف منك شرايد حسين
مو تزوره وإنته جاهل غايته
حسين رايد روح تنهض بالضريح
مو تحط دينار ما هو بحاجته
روح علگ گلبك ابباب الحسين
وشيل كل هذا الذهب من حضرته
حسين ما محتاج عالگبه ذهب
الذهب محتاجه راح الگبته
والناس لو تدري الذهب قصد الحسين
چان ما نصرت يزيد وخانته
وياهو گال الناس فقدت چم حسين
وياهو كَال هوايه وادم تبعته
صاح صوت امن السمه بمقتل حسين
وبعده لسه يصيح محد سكّته
شلون ما نبچي وندگ لاجل الحُسين
وكل سنه بعاشور ننصب مأتمه
انكسر ظهر الكون من طاح الحسين
والجبال من اللطم متثلمه
ولأن ماكو چفوف وتدگ النجوم
تنهدگ عالگاع وترد للسمه
تدري شنهي المعجزه بلطم الحسين؟
ما تموت الناس لو تمطر دمه
ويه كل چف يرتفع يوكَف مَلاك
شما يدگ المحب صدره يقدمه
وعدنا بالدنيا زلم لولا الملاك
چا صدرها بضربه وحده تهشمه
وأخيراً هذه (ومضات حسينية) للشاعر عبد الحسين الحلفي، وهي بمثابة نجوم في سماء العشق الحسيني، وليس ومضات شعرية فحسب..
زين وناس اكو وما عندك عـيـون
آنه عيون عندي وما شفت نــاس
گبل عباس أكو بس ما لگه اچفـوف
هسه اچفوف اكو بس ماكو عبـاس
----------
أكو باقين بس عن گلبي راحــوا
وأكو راحوا بنص الگلب باقــين
ظلم كل آدمي اتسمونه إنســان
وجريمه كل علي اتسمونه أبو حسين
