خيعونه اليطوف بحضرتك مظلوم
وخيعونه اليشكي همومه بالحضره
ياسيف النبي ويافرحه المسكين
وياباب الصبر للي خلص صبره
تمنيت بضريحك روحي من تروح
يازوج البتول الطاهره الحره
حته الانبياء تندب علي الكرار
اسمك ياعلي بالموزمه شكبره
تاريخك مجد ياسيد التاريخ
ياعلم الفلك والكون والذره
منو مثلك علي ضحه شكثر للدين
واخر تضحياته يضحي في عمره
ومن سمو اسد في معركة صفين
وبصولة بدر خله الزلم حدره
ومنهو الي قهر امه بني اسرائيل
وظلت الى الان بأسمه منقهره
علي اسمك قبل ما واحد مسميه
جبرائيل خط اسمك على الصخره
بالكعبه يحيدر طلكت امك بيك
وحته الجن الازرك لبد في جحره
يونس ندب بيك انته قبل متصير
وكال احضر علي وخلصنه هل المره
يندب ياعلي المضايق ومظلوم
واليندب علي شكد ينفتح صدره
عفيه شكد عظيم انته يبو الابطال
الجن والانس منك كله متوشره
ومنو غيرك شفيع انه يبو الكلفات
لو قامت الساعه بناره الكبره
ياركن الرساله ويابو ثار الله
ويا اول القدره واخر القدره
ويا سيف الفقار وقاري علم الغيب
ويا بيرغ محمد ساعة الوشره
ياصنديد يالمثلك فلا موجود
وكعبه الطلكتك مو حقه مفتخره
عاشرنه طريقك باول المشوار
وبس ابن الزنه الي ينكر العشره
والله ياعلي مننخاك وكت الضيج
همومي تروح كله وتنجلي الحسره
ومحمد بالغدير شكال للاسلام
مو وصه بعلي بالامر من بعده
ويتبره محمد منه يوم الدين
كلمن ما حزن في ليله الطبره
علي وبنك حسين العجب الثوار
بيرغ رفع راسه بأخر الثوره
حسين الماخذل دينه وكتاب الله
شلون يذل حسين وامه الزهره
ناده الموت اولى من ركوب العار
وخله جيوشهم على الارض مطشره
وابنك ابو فاضل بالغضب بركان
ليث وبالشدايد محد يكدره
سحكه بالفرات وخله دمه يسيل
تمنيت الفرات تنشف ولاقطره
لان عطش جبود المصطفى الابرار
وعباس نغدر باليمنه واليسره
انه مهموم اشتكيلك حالي يامولاي
انه بصدري يحيدر غافيه العبره
توازت ياعلي والباطل السياف
والحق صار اخرس وانكسر ضهره
مايخدر جرحنه ومايريد يطيب
اسم فرعون بيه الجرح شيخدره
الضلع طك وانكسر واختلت الاوزان
ومنو غيرك غضنفر يكد يجبره
ياحامي الحمه شنسوي محتارين
تعبنه من الدماء والظلم والهجره
ماصارت كبل حته بزمن نمرود
السواهه يزيد وزمرته وشمره
انه منين ابتديلك واحجي من ياباب
من هاذه الزمان القاسي وغدره
حقدوا على النسل جي من علي الكرار
شكم هاشمي أيه الضيعوا ذكره
خلصنه انتهينه كلي وين نروح
وعيشتنه صفت ياعيشه الكشره
ياحاكم يجينه يكض علينه الصوت
قسوا بسيوفهم وجفوفهم قذره
اعتقلات ومشانق سجل التاريخ
وماكو من ضلمهم كل بشر يبره
شكد سنين عشنه بعالم الاحزان
كل يوم اليجي نتأمل البشره
من هالك المالك ننشره وننباع
وطنه ياعلي صار بورق سعره
لحدمن سيدي استعمار بستعمار
وياحاكم يجين محمل ابشره
انطينه تضحيات من الشباب هواي
مو مليون حته تعدوا العشره
شجاه هذا الوطن بي كثرة الرايات
كلمن رايته ودستوره وقصره
وشجا هذا الوطن ياوطن البترول
الحراميه تحوف ومحد ينطره
